Wazazi msiwafiche ndani watoto wenye mahitaji maalum - Dkt. Mpango

Imewekwa tar.: August 22nd, 2024

Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango, ametembelea shule ya Msingi Iboni iliyopo katika Halmashauri ya Kondoa Mji Agosti 21, 2024 ambayo ina watoto wenye Mahitaji maalumu na kutoa zawadi kwa wanafunzi hao.

Akiwa shuleni hapo ikiwa ni muendelezo wa ziara yake ya siku nne Mkoani humo, Dkt. Philip Mpango amekagua Mradi wa ujenzi wa mabweni mawili katika shule hiyo ambayo yamejengwa kwa fedha za Serikali kuu jumla ya shilingi Milioni 270.9 yanayowezesha wanafunzi hao kupata huduma ya karibu shuleni 

"Watoto hawa Wana uwezo Mkubwa na vipaji vyao vya pekee. Wazazi niwaombe, tumepata kituo hiki kizuri kwa ajili yao, tusiwafungie ndani watoto hawa. Waleteni kwenye kituo chetu hiki wapate Elimu" Amesisitiza Mhe. Mpango

Hata hivyo, Mhe. Mpango, ametoa zawadi kwa wanafunzi hao ikiwa ni pamoja na magodoro 80 na baiskeli za viti mwendo zitakazowasaidia baadhi ya wanafunzi hao wenye uhitaji. Shule hiyo Ina jumla ya wanafunzi waliosajiliwa 35 na walimu watatu (3) huku uhitaji kamili ikiwa ni walimu 12.

Sambamba na hilo, Makamu huyo amepanda mti aina ya 'Mti maji' katika eneo la shule hiyo kama ishara ya utunzaji wa Mazingira na baada ya hapo alifanya Mkutano wa hadhara na wananchi wa eneo hilo ambapo waliibua kero mbalimbali ambazo ameahidi Serikali haitalala mpaka kero zote za wananchi wake zinatatuliwa.