USALAMA WA MTOTO NI MUHIMU KWA JAMII – DKT.MSONDE

Imewekwa tar.: September 8th, 2023

Naibu Katibu Mkuu Ofisi ya Rais Tawala za Mikoa na Serikali za Mitaa (TAMISEMI) Dkt.Charles Msonde amewataka wazazi, walezi na jamii  kushirikiana kikamilifu na walimu katika Malezi na Usalama wa Watoto.

Dkt.Msonde ameyasema hayo leo Septemba 8, 2023 Jijini Dodoma wakati akizungumza katika Ufunguzi wa Mafunzo ya kuwajengea uwezo Waratibu wa Mpango wa Shule Salama na wasimamizi wa usalama wa jamii wa Mikoa na Halmashauri.

"Malezi na ulinzi wa Mtoto ni jukumu letu sote hivyo Wazazi, walezi na jamii  shirikianeni  na shule  katika kuhakikisha  mnawalinda watoto na kuwakinga dhidi ya ukatili katika jamii, msiwaachie jukumu hilo walimu pekee  kwani mtoto anaweza kupata changamoto nyumbani, kwenye jamii ama shuleni, hivyo ni muhimu kuwalinda kwa pamoja,"amesema Msonde.

Amesema Malezi ya watoto ni jambo la muhimu ndani ya jamii hivyo ni wajibu wa walimu kuhakikisha watoto wanapata malezi bora kwa kuhakikisaha kila siku wapo katika mazingira salama 

“ usalama wa watoto unaanzia  katika familia, shuleni na  ndani ya jamii, hivyo ni wajibu wa Maafisa Maendeleo ya Jamii kuhakikisha  usalama wa mtoto unapatikana ndani ya jamii “ amesema Dkt.Msonde

Dkt. Msonde amefafanua kuwa malezi ya watoto yanahitaji  ushiriki wa Wazazi, walimu  na Jamii kwa ujumla hivyo ni wajibu wa Maafisa Maendeleo ya Jamii pia kuhakikisha  wanahamasisha jamii kutambua umuhimu wa usalama wa mtoto ndani ya jamii.

“ Wazazi wanapaswa kuelewa   kwamba ili mtoto awe na maadili  mema na nidhamu  kwa kuzingatia mila na desturi ushiriki wa wazazi ni muhimu , ushiriki wa jamii kwa ujumla kuhusu malezi ya watoto ni muhimu” amesisitiza Dkt. Msonde

Amewataka Maafisa Ustawi wa Jamii kuhakikisha watoto wanaopata matatizo ya ukatili wanawahudumiwa vizuri  kwa kuwajenga kisaikolojia ili kumlinda mtoto. 

Dkt. Msonde  ametoa Rai kwa shule zote za msingi na Sekondari nchini kuhakikisha wanakuwa na Wanasihi ambao watachaguliwa na watoto wenyewe lengo likiwa ni kuwapata watu sahihi kwani watachaguliwa watu salama watakaoweza  kuwa huru kueleza matatizo  yao  kwa uhuru na  usalama. 

Aidha,amewaagiza Wakuu wa shule nchini kuhakikisha  kunakuwepo na Mpango salama wa shule, mabaraza ya watoto ambayo watoto watajadili kwa uwazi changamoto zinazowakabili na kuwepo kwa masanduku ya watoto kutolea maoni  ili kuhakikisha watoto wanakuwa salama wakati wote.

Hii hapa. Kama kuna vox ya washiriki itapendeza pia.