UNGUJA YAIADHIBU SIMIYU KIKAPU WAVULANA

Imewekwa tar.: June 23rd, 2025

Timu ya mpira wa kikapu kutoka Kanda ya Unguja-Zanzibar, imebuka na ushindi baada ya kuifunga Simiyu kwa jumla ya vikapu 68-14 katika mashindano ya UMISSETA 2025 yanayofanyika mkoani Iringa.

Unguja imepata ushindi huo katika mchezo uliochezwa leo juni 23,2025 kwenye viwanja vya Shule ya Sekondari Lugalo-Iringa na kujiweka katika nafasi nzuri ya kufuzu hatua ya robo fainali.

Kocha wa timu ya Unguja Ally Salim, amewapongeza vijana wake kwa ushindi huo mnono, na kuahidi kuendelea kufanya vizuri katiia michezo inayofuata.

Amesema ushindani ni mkali ikilinganishwa na miaka iliyopita, lakini wataendelea kutumia vema nafasi wanazopata katika kila mchezo ili kufanikiwa kufika fainali na kushinda ubingwa wa mwaka huu.

"Timu zote zimejiandaa vizuri, hata wenzetu tuliotoka kuwafunga ni wazuri na wametupa mchezo mgumu, hii inaonesha namna ambavyo mashindano haya ya mwaka huu ni ya kipekee na yenye ushindani wa hali ya juu" amesema Salim.

Visiwa vya Zanzibar vinawakilishwa na Kanda za Unguja na Pemba, hivyo kukamilisha jumla ya mikoa 28 ya Tanzania inayoshiriki UMISSETA 2025.

Mashindano ya Umoja wa Michezo na Taaluma Tanzania kwa Shule za Sekondari (UMISSETA) yanaandaliwa na Ofisi ya Rais-TAMISEMI ikishirikiana na Wizara ya Elimu, Sayansi na Teknolojia pamoja na Wizara ya Habari, Utamaduni, Sanaa na Michezo.

Kaulimbiu ya mwaka huu inasema viongozi bora ni msingi wa Maendeleo,Taaluma,Sanaa na Michezo, Shiriki Uchaguzi Mkuu 2025 kwa Amani na Utulivu.