Rasimu ya Sera ya Taifa ya Ugatuzi ipo tayari kujadiliwa - Mhe. Katimba

Imewekwa tar.: June 19th, 2025

Serikali imeandaa Rasimu ya Sera ya Taifa ya Ugatuzi wa Madaraka itakayoanza kujadiliwa katika ngazi mbalimbali za maamuzi na itakapokamilika na kuanza kutumika itaongeza ufanisi na kuimarisha Ugatuzi katika Sekta mbalimbali Serikalini. 

Hayo yamesemwa leo tarehe 19,Juni 2025 bungeni na Naibu Waziri Ofisi ya Rais - TAMISEMI,  Mhe. Zainab Katimba wakati wa kipindi cha maswali na majibu wakati akijibu swali la Mhe. Agnesta Lambert, Mbunge wa Viti Maalum kwa Niaba ya Mhe. Mohamed Mchengerwa, Waziri wa Nchi, Ofisi ya Rais - TAMISEMI. 

Mhe. Lambert alitaka kujua maeneo ya kuweka mkazo ili Sekta nyingine zitekeleze na kuwa sehemu ya utekelezaji wa azma ya Ugatuzi wa Madaraka.

Akijibu swali hilo Mhe. Katimba amesema, “Ugatuzi wa Madaraka nchini unasimamiwa kupitia Andiko la Kisera la Maboresho ya Serikali za Mitaa la mwaka 1998 (Policy Paper on Local Government Reform, 1998) na imelenga kupeleka madaraka, rasilimali na maamuzi kutoka Serikali Kuu kwenda Serikali za Mitaa.” Amesema Mhe. Katimba

Akisisitiza hilo Mhe. Katimba amesema faida zilizopatikana kwa kutekeleza Sera hiyo ni pamoja na kuimarika kwa ushiriki wa wananchi katika kupanga, kusimamia na kutathmini maendeleo ya maeneo yao na kuimarisha utoaji wa huduma za kijamii kwa Umma mathalani elimu na afya katika Mamlaka za Serikali za Mitaa.