NDEJEMBI ATAKA UENDELEVU MFUMO WA M-MAMA

Imewekwa tar.: May 17th, 2023

NAIBU Waziri, Ofisi ya Rais-Tawala za Mikoa na Serikali za Mitaa  Mhe.  Deogratius Ndejembi amewataka waratibu wa Mfumo wa Usafirishaji wa Dharula kwa akina mama wajawazito, waliojifungua na watoto wachanga(m-mama) kuwa endelevu. 

Ndejembo ameyasema hayo leo Mei 16, 2023 wakati wa kufungua kikao kazi cha waratibu wanao simamia mfumo wa m-mama kilichofanyika jijini Dodoma..

Amesema  Serikali imeleta mfumo huo ili kutatua changamoto ya rufaa na usafiri wa dharura kwa wamama wajawazito, waliojifungua na watoto hapa nchini.

“Bado tuna changamoto kubwa kwenye usafiri wa dharura, na jambo hili ni moja ya vipaumbele katika kuokoa maisha ya Wajawazito na watoto wachanga wanapokuwa na dharura za kiafya na ndio maana imekuja na mfumo huu.”amesema Ndejembi

Ndejembi pia amehimiza ushirikiano  kwa wadau wote wanaohusika katika kuutekeleza mfumo wa m-mama na kuhakikisha gharama za usafiri wa dharura kwa akina mama wajawazito, waliojifungua na Watoto Wachanga zimejumuishwa katika mipango na bajeti kwa kila halmashauri. 

Pia amewataka kufuatilia watendaji wa vijiji na kuwaelekeza kuwatambua wamiliki wa magari vijijini, kuwasajili na baadaye halmashauri kuingia nao makubaliano.

Ndejembi amewaagiza waratibu hao kuhakikisha wanafuatilia malipo ya madereva ili walipwe kwa wakati na kuweza kutoa huduma bora kwa jamii. 

“Hakikisheni hawa wanajamii wanalipwa kwa wakati. Madereva jamii hawa wakilipwa kwa wakati, watakuwa vinara  wazuri sana kwenye mfumo huu, wataumiliki mfumo na kuhakikisha unatekeleza vizuri, hivyo fuatilieni wasije wakaandamana huko.”amesisitiza

Naye Mkuu wa TEHAMA kutoka Wizara ya Afya Zanzibar  Mahamed  Mafazy amesema

Serikali ya Mapinduzi Zanzibar imejipanga kuanzisha mfuko ambao utamlazimisha mwananchi kuwa na bima ya afya na kuifanya huduma ya magari ya wagonjwa kufanywa na sekta binafsi huku mfumo wa M-Mama ukipewa kipaumbele.

“Mbali na hatua ya Serikali kununua magari ya wagonjwa 11 kwa kila wilaya, pia tutatoa fursa kwa sekta binafsi kutoa huduma hii na tutazisajili gari hizo ili zitoe huduma kwa wananchi.”amesema Mafary

Kwa upande wa Meneja wa Vodacom Tanzania Kanda ya Kati, Joseph Sayi amesema katika kutekeleza mfumo huo mpaka sasa  safari 21,000 zimefanyika na kuokoa maisha ya watoto wachanga na akina mama zaidi ya 805.

“Haya ni mafanikio makubwa ambayo yasingewezekana bila juhudi zetu sote ”

Amesema ili kufanikisha usambazaji wa Mfumo wa m-mama nchini Vodacom kupitia Foundation yake imetoa dola za Marekani milioni 10 na shirika la USAID limetoa dola za Marekani milioni 5 wakati Serikali ya Tanzanioa imechukua jukumu la kulipa madereva jamii na kuchukua gharama za rasilimali watu kataka Wizara zake za afya na TAMISEMI.

Mratibu wa Mfumo wa M-Mama Taifa Dkt. Yahaya Hussein Kutoka Ofisi ya Rais- TAMISEMI amesema mfumo huo unatekelezwa katika mikoa 14 ya Tanzania Bara na Mikoa yote ya Zanzibar