Miradi ya Kimkakati Iwezeshe Halmashauri Kujitegemea - Nyamhanga

Imewekwa tar.: September 14th, 2019

Serikali imepongeza ujenzi wa stendi kuu ya kisasa kwa mabasi yaendayo mikoani Jijini Arusha utakaogharimu shilingi bilioni 10 katika hatua za awali.

Akiongea wakati wa ziara yake ya kikazi hii leo Jijini Arsha Katibu Mkuu Ofisi ya Rais TAMISEMI Mhandisi Joseph Nyamhanga amesema Ofisi ya Rais TAMISEMI amepongeza ujenzi wa stendi hiyo unaotarajiwa kuanza eneo la Orasiti nje kidogo ya Jiji la Arusha mara baada ya taratibu za ujenzi kukamilika ikiwa ni pamoja na kulipa fidia ya maeneo ya wananchi yaliyochukuliwa.

Amesema azma ya Serikali ni kuboresha miji, majiji na manispaa kuwa za kisasa zaidi ambapo mpaka sasa Serikali imetumia shilingi bilioni 88 kwa miradi 27 ya kimkakati ikiwemo stendi na masoko kwa ajili ya kuongeza mapato ya Mamlaka za Serikali za Mitaa.

Mhandisi Nyamhanga amesema lengo la Serikali ni kuzifanya Mamlaka za Serikali za Mitaa kujitegemea kwa asilimia 100 bila kutegemea fedha za ruzuku kutoka Serikali Kuu baada ya kuboresha mapato yao na hili litaanza na majiji na halmashauri ambazo zimeboresha mapato yao.

Katibu Tawala Mkoa wa Arusha Bw. Richard Kwitega amesema kuna mahitaji makubwa ya stendi kutokana na msongamano wa mabasi kwenye kituo cha mabasi na hivyo ujenzi wa stendi mpya na baadhi ya barabara za mzunguko zitaondoa kero ya foleni na msongamano katika Jiji la Arusha.

Naye Mhandisi wa Jiji la Arusha Samwel Mshuza amesema stendi ya Orasiti una ukubwa wa ekeari 29.65 na upo katika hatua za uhakiki wa kulipa fidia ya maeneo kiasi cha shilingi bilioni 1.99 na kutangaza zabuni ya kumtafuta mkandarasi mshauri kwa ajili ya kuandaa michoro.

Mshuza amesema fedha za mradi ni mkopo kutoka benki ya Azania kiasi cha shilingi bilioni 10 na utakapokamilika unatarajiwa kuongeza mapato ya Jiji kwa kiasi cha shilingi bilioni 3.5 kwa mwaka na pia utaondoa msongamano uliopo wa mabasi kwenye kituo cha sasa.

Katika hatua nyingine mhandisi Nyamhanga amekagua ujenzi wa barabara za Serengeti, Machame, Leyora na Sanawari zenye urefu wa kilomita 0.74 ambao umefikia asilimia 76 unaotekelezwa na TARURA kwa fedha kutoka Mfuko wa Barabara kiasi cha shilingi 587,317,000

Mradi mwingine ni barabara za Oljoro-Muriet, bypass-Kisongo, Njiro, Krokon, Ngarenaro na Sombetini-FFU ambazo zinajengwa na mkandarasi Sinohydro Co Ltd kwa gaharama ya shilingi 26,403,980,916.61 na mradi wote umefikia asilimia 94.

Nyamhanga ameagiza miradi yote kukamilika kwa wakati na kujali thamani halisi ya fedha ili kuleta tija kwa wananchi.

               Anaandika Fred Kibano