Kayatekelezeni yale Mlioyapata kwa Ustawi wa Nchi Yetu - Nyingo

Imewekwa tar.: August 12th, 2024

Na OR TAMISEMI, IRINGA

Mwakilishi wa Mkuu wa Mkoa wa Iringa ambaye pia ni Mkuu wa Wilaya ya Kilolo Mheshimiwa Joachim Nyingo amefunga mafunzo ya siku mbili kwa Maafisa Tarafa na Watendaji Kata kwa Mkoa wa Iringa na kuwataka washiriki kuimarisha usalama, amani na utulivu kwenye maeneo yao wakati wote. 

Kauli hiyo ameisema leo tarehe 12/08/2024 Mkoani Iringa, katika Manispaa ya Iringa wakati akifungua mafunzo ya Maafisa Tarafa na Watendaji wa Kata mkoani. 

“Serikali ya awamu ya sita inapeleka pesa nyingi kwenda kutekeleza miradi katika maeneo yenu kwa kutumia mfumo shirikishi wa ujenzi (Force Account) ambao umeonesha kutumia gharama ndogo kwa matokeo makubwa, hivyo mkaboreshe usimamiaji wa miradi husika kwa ukamilifu” alisema Nyingo.

Aidha, Nyingo amesema lengo la kutoa mafunzo hayo ni kuboresha utendaji wao wa kazi katika maeneo yao ambapo amewaasa mafunzo walioyapata yakawe chachu ya maboresho ya utendaji wao wa kazi na kwenda kuwarithisha wengine kile tulichokipata katika ngazi ya msingi.

Awali Mkurugenzi Msaidizi Ofisi ya Rais TAMISEMI Ndugu Hamisi Mkunga aliwaasa washiriki wa mafunzo, kupeleka elimu waliyoipata kwenye mafunzo haya kwa Watendaji wao wa Vijiji na Watendaji wa Mitaa ili kuboresha utendaji kazi katika maeneo yao.

Kwa upande mwengine, Bi. Kissa F. Mwandete Afisa Tarafa wa Kalenga amesema mafunzo hayo yamemjengea uwezo na kumkumbusha kutekeleza majukumu yake ya kila siku katika maeneo ya utawala bora, kutatua migogoro ya wananchi na kuwahabarisha wananchi shughuli zinazotekelezwa na Serikali katika maeneo yao.

Naye Mtendaji wa Kata ya Malangali Halmashauri ya Wilaya ya Mufindi Bi. Jesca W. Nyahoro ameeleza kuwa mafunzo haya yatamsaidia kutatua changamoto kwa wananchi, kutunza siri za kiutumishi, ufuatiliaji wa miradi na kuboresha maadili ya kiutumishi.

Ofisi ya Rais TAMISEMI inaendelea kukamilisha utoaji wa mafunzo kwa Maafisa Tarafa na Watendaji wa Kata Mikoa yote 26 Tanzania Bara na tayari mikoa 24 imeshapatiwa mafunzo haya yanayotolewa na Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP), kwa kushirikiana na Chuo cha Serikali za Mitaa Hombolo na Chuo cha Utumishi wa Umma.