Bilioni 35 zatumika Kujenga Miundombinu ya Shule za Msingi

Imewekwa tar.: December 12th, 2019

Serikali ilipeleka zaidi ya shilingi  bilioni 35 kwenye shule za msingi na Awali  kwa ajili ya ujenzi wa    madarasa 2,897  na vyoo 533 ili kukabiliana na changamoto ya miundombinu mashuleni hadi kufikia mwezi Juni, mwaka huu.

Dkt. George Jidamva Mkurugenzi Msaidizi wa Elimu ya Msingi OR-TAMISEMI ameyasema hayo wakati akifunga kikao  kazi cha  Elimu ya Awali chini ya Mradi wa Watoto Wetu Tunu Yetu ‘Children in Crossfire’ kwamba lengo lilikuwa ni kukabiliana na changamoto iliyotokana na Mpango wa elimu msingi bila malipo ambao ulipelekea kuwa na idadi kubwa ya uandikishwaji  wa wanafunzi hasa kwa madarasa ya Awali na la Kwanza.

Amesema jumla ya madarasa ya awali yapatayo 16129 yamejengwa,  mafunzo ya Mtaala mpya, kutoa Miongozo ya walimu, vitabu vya kiada na hadithi kwa Elimu ya Awali yamefanyika na hivyo kutachangia kuboresha elimu ya awali nchini.

Jidamva amesema Mradi wa Watoto Wetu Tunu Yetu umechangia kuinua ubora wa Elimu ya Awali kwenye shule za msingi kwa kuweka mazingira mazuri ya kujifunzia kwa zaidi ya wanafunzi 10000, kuwapatia mafunzo walimu wa Awali 99, kutoa mafunzo kwa wadau ngazi ya Wilaya, kuhamasisha suala la lishe shuleni ikijumuisha  maji safi na salama ya kunywa, Ushiriki wa wazazi kufuatilia maendeleo ya watoto shuleni na Matumizi ya vifaa vinavyotokana na mazingira halisi.

Kwa upande wake Craig Ferla ambaye ni Mkurugenzi Mkazi wa shirika la Children in Crossfire amezishukuru wizara zote mbili Wizara ya Elimu, Sayansi na Teknolojia na Ofisi ya Rais TAMISEMI na kuwapongeza washiriki wote ambao wameshiriki katika mijadala yote wakati wa kikao kazi.

Akitoa neno la shukrani, Kaimu Afisa Elimu Mkoa wa Dodoma Agripina Kanyahubunza amelishukuru Shirika la Children in Crossfire kwa kuuchagua mkoa wa Dodoma kuwa sehemu ya mradi na kwamba utekelezaji wa mradi utaanza mara moja.

Mradi wa Watoto Wetu Tunu Yetu unalenga kuboresha mazingira ya Elimu ya Awali na unafadhiliwa na ApexHousing Association ya Ireland ya Kaskazini kupitia shirika lake la Children in Crossfire Tanzania. Mradi unatekelezwa katika mikoa ya Mwanza na Morogoro na kwa sasa wilaya za Chemba na Kongwa mkoani Dodoma.

                                       Anaandika Fred Kibano